തിരുവിതാംകൂറിലെ വലിയ ഉദ്യോഗങ്ങൾ

  • Published on December 26, 1906
  • Svadesabhimani
  • By Staff Reporter
  • 234 Views

We have noticed that there is a move to retire several senior officials of Travancore by next year and replace them with foreigners. The new civil service regulation clearly states 55 as the age for retirement.  Many developed nations are trying to retain the 'gray hair',  while Travancore government hates even the hair that is beginning to gray.


*Certain words in this article were not clear in the original document. Those words are replaced with '.....'.

തിരുവിതാംകൂറിൽ ഇപ്പോഴുള്ള വലിയ ഉദ്യോഗസ്ഥന്മാരിൽ പലരെയും അടുത്ത കൊല്ലത്തിൽ പെൻഷ്യൻ കൊടുത്തു വിടുർത്തുമെന്നും ആ ഉദ്യോഗങ്ങളിൽ ചില പരദേശികളെ നിയമിക്കുന്നതിന് ആലോചനയുള്ളതായും  അതിലേക്ക് ചിലരെ അന്വേഷിച്ച് തുടങ്ങിയിട്ടുള്ളതായും അറിയുന്നു. പുതിയ സിവിൽ സർവീസ് റെഗുലേഷൻ ഊർജ്ജിതത്തിൽ ഇരിക്കുന്ന സ്ഥിതിക്ക് പല വലിയ ഉദ്യോഗസ്ഥന്മാരും അടുത്തകൊല്ലത്തിൽ പെൻഷൻ വാങ്ങി വേല വിടേണ്ടിവരുമെന്നുള്ളത്  തീർച്ചതന്നെ. ഇപ്പോഴത്തെ സിവിൽ സർവീസ് റെഗുലേഷൻ എത്ര തന്നെ പരിഷ്‌കൃതമായ ഒരു നിയമമാണെന്ന് ഘോഷിച്ചാലും ഒരു ഉദ്യോഗസ്ഥൻെറ, ജീവനാവസാനത്തിൻെറ പരമാവധി അയാളുടെ 55 -മത്തെ വയസ്സായിരിക്കും എന്ന് ഖണ്ഡിതമായി കല്പിച്ചിരിക്കുന്ന ഭാഗം വളരെ ദോഷകരമാണെന്ന് സമ്മതിക്കാതിരിക്കാൻ നിവർത്തിയില്ല. ഗവണ്മെന്റിനു വർഷംതോറും അനാവശ്യ നഷ്ടത്തെ വർധിപ്പിച്ചുകൊണ്ടിരിക്കാനിടയുള്ള ഈ ഭാഗം ഒന്നു ഭേതപ്പെടുത്തേണ്ടത് അത്യന്താപേക്ഷിതമാണെന്നാണ് ഞങ്ങൾക്ക് തോന്നുന്നത്. വലിയ ഉദ്യോഗസ്ഥന്മാർ എല്ല് കൊണ്ടോ മാംസംകൊണ്ടോ വേല ചെയ്യേണ്ടവരല്ല. അവർ തലച്ചോറ് കൊണ്ട് വേല ചെയ്‌താൽ മതിയാവുന്നതാണ്. വൃദ്ധത, തലച്ചോറിന് വികാസത്തെയും ശുദ്ധതയെയും ഉണ്ടാക്കുന്നതല്ലാതെ ഒരിക്കലും മാന്യതയെ ഉണ്ടാക്കുകയില്ല. ഇംഗ്ലണ്ട്, അമേരിക്ക, ഫ്രാൻസ് മുതലായ പരിഷ്‌കൃത രാജ്യങ്ങളിൽ "നരച്ച തലമുടി"ക്കാണ് അധികം മാഹാത്മ്യം കല്പിക്കപ്പെട്ടു പോരുന്നത്. ലോകത്തെ നല്ലവണ്ണം അറിയുന്നതിന് "നരച്ച തലമുടി" കാര്യം സാധിക്കുന്നതിനുള്ള തത്വം മനസ്സിലാക്കിയാണ് അവർ അങ്ങനെ ചെയ്യുന്നുവെന്നുള്ളതിന് സംശയമില്ലല്ലോ. ഇംഗ്ലണ്ട് മുതലായ പരിഷ്‌കൃത ഗവന്മെന്‍റുകൾ, വലിയ ഉദ്യോഗങ്ങൾക്ക് "നരച്ച തലമുടി"കളെ ആകർഷിക്കുമ്പോൾ നമ്മുടെ തിരുവിതാംകൂർ ഗവണ്മെന്‍റ് "നരക്കാൻ ആരംഭിക്കുന്ന തലമുടികളെ"പ്പോലും വെറുക്കുന്നത് പരിതാപകരം തന്നെ. വലിയ ഉദ്യോഗങ്ങൾ വഹിക്കുന്നതിന് നര അല്ലെങ്കിൽ വൃദ്ധത ബാധകമാണ് വരുകയില്ലെന്ന് യൂറോപ്പ്യൻ രാജ്യങ്ങളിലേക്ക് നമ്മുടെ കണ്ണുകളെ അയച്ചാൽ നമുക്ക് ബോധ്യപ്പെടും. നാം, മനുഷ്യൻെറ ലൗകികജ്ഞാനത്തെ പ്രത്യക്ഷീകരിക്കുന്ന ഒരു നിർമ്മല വിചനമാകുന്നു. ഇതിനെ വെറുക്കുന്നവർ ലൗകികജ്ഞാനത്തെ വെറുക്കുകയാണ് ചെയ്യുന്നത്. വലിയ ഉദ്യോഗങ്ങളിൽ വൃദ്ധതകൊണ്ട് ലോകപരിചയം സമ്പാദിച്ചിട്ടുള്ള പരിപക്വവിദ്യകളെ നിയമിക്കുന്നത് ബുദ്ധിപൂർവ്വകമായ കൃത്യമെന്നുള്ളത് സർവ്വസമ്മതമാണ്. അതിനാൽ 55 വയസ്സ് പൂർത്തിയാകുന്ന ഉദ്യോഗസ്ഥന്മാരെ പെൻഷൻ കൊടുത്ത് വിടണമെന്ന് നിർബന്ധിക്കുന്ന ഈ നിയമം, കാര്യപരിചയം ഉള്ളവരും പരിപക്വബുദ്ധിയുള്ളവരുമായ ഉദ്യോഗസ്ഥന്മാരുടെ പ്രശാന്തരമണീയമായ...സാഹസികമായി പരിത്യജിക്കയാണ് ചെയ്യുന്നതെന്നുള്ളതിന് സംശയമില്ല. വലിയ ഉദ്യോഗസ്ഥന്മാരുടെ സർവീസിൻെറ പരമാവധി, പഴയ തോതനുസരിച്ച് 51 ആക്കുന്നത് ഈ നാടിൻെറ സ്ഥിതിക്ക് ഗുണകരവും ഉത്തമവും ആയിരിക്കുമെന്നാണ് ഞങ്ങൾക്ക് തോന്നുന്നത്. എന്നാൽ ഞങ്ങൾ ഇപ്പോൾ ഈ നിയമത്തിൻെറ ന്യൂനതകളെ ചൂടിക്കാണിക്കുന്നതിനു ഭാവിക്കുന്നില്ല. സന്ദർഭവശാൽ അതിനെ സംബന്ധിച്ച് ഇത്രയും ഇവിടെ പറഞ്ഞെന്നേയുള്ളൂ. തിരുവിതാംകൂറിലെ വലിയ ഉദ്യോഗങ്ങളിൽ നാട്ടുകാരെ നിയമിക്കുന്നതിൽ ഗവണ്മെന്‍റ്   കാണിക്കുന്ന വൈമനസസ്യത്തെപ്പറ്റി കരഞ്ഞോണ്ട് പുറപ്പെടാനാണ് ഞങ്ങൾ ഇപ്പോൾ ഭാവിക്കുന്നത്‌. 

തിരുവിതാംകൂറിലെ വലിയ ഉദ്യോഗങ്ങൾക്കു സ്വദേശികളേക്കാൾ പരദേശികളാണ് അധികം യോഗ്യതയുള്ളവരാണെന്നുള്ള ഒരു മിഥ്യാഭ്രമം ഗവണ്മെന്‍റിനെ ഇപ്പോഴും ബാധിച്ചുകൊണ്ടിരിക്കുന്നതായി കാണുന്നതിൽ ഞങ്ങൾ അത്യന്തം ആശ്ചര്യപ്പെടുകയും വ്യസനിക്കയും ചെയ്യുന്നു. വലിയ ഉദ്യോഗങ്ങളിൽ അധികവും വളരെക്കാലമായി കാണപ്പാട്ടം കൊടുത്തിരിക്കുന്നതു പോലെ, പരദേശികൾക്ക്, അധീനമാക്കി ചെയ്തിരിക്കുന്നു. രാജ്യസ്‌ഥിതിയെയോ, ജനങ്ങളുടെ സ്വഭാവങ്ങളെയോ ശരിയായി ഗ്രഹിച്ചിട്ടില്ലാത്ത പരദേശികന്മാരാണ് ഭരണ യോഗ്യന്മാർ എന്ന് വിചാരിക്കുന്നതും അതിനനുരൂപമായി പ്രവർത്തിക്കുന്നതും സാഹസമാണെന്നാണ് ഞങ്ങൾ പറയുന്നത്. തിരുവിതാംകൂർ, വിവിധജാതിമതസ്ഥരാൽ അധിവസിക്കപ്പെട്ടുപോരുന്ന ഒരു രാജ്യമാണ്. അതിനെ ഭരിക്കുന്നതിന് പ്രത്യേകിച്ചൊരു ഭരണതന്ത്രം ഉണ്ടായിരിക്കണം. നാടിനെയും നാട്ടുകാരെയും നല്ലവണ്ണം അറിയുന്ന ആളുകളുടെ ഭരണത്തെയാണ് ജനങ്ങൾ ഇപ്പോഴും ആഗ്രഹിക്കുന്നത്. നാടിനെക്കുറിച്ചോ,നാട്ടുകാരെക്കുറിച്ചോ യാതൊന്നും ഗ്രഹിച്ചിട്ടില്ലാത്ത പരദേശികന്മാരെ ഭരണാധികാരന്മാരായി പ്രതിഷ്ഠിക്കുന്നതിലധികം ദോശാവഹമായ ഒരു കൃത്യം - കഠിനതരമായ ഒരു കൃത്യം - ഒരു ഗവണ്മെന്‍റ്    ചെയ്യേണ്ടതില്ല. രാജ്യസ്തിതിയും ജനങ്ങളുടെ സ്വഭാവവും സൂക്ഷ്മമായി അറിഞ്ഞിരിക്കുന്ന ആളുകളുടെ ഭരണം ഒരിക്കലും ക്ഷോഭാജനകമായി പരിണമിക്കയില്ല. വർത്തമാന പത്രങ്ങൾ മുഖേനയോ മറ്റോ ഏതാണ്ടൊക്കെ ഗ്രഹിച്ചിട്ടുണ്ട്. ജനങ്ങളുടെയും രാജ്യത്തിൻെറയും ....... ഭാവനയോടുകൂടി ജനങ്ങളെ ഭരിക്കുന്നതിന് ഉദ്യമിച്ചാൽ അത് ഒരിക്കലും ഗുണകരമായിരിക്കയില്ല. നാട്ടിൽ സഞ്ചരിച്ചും ജനങ്ങളുമായി സഹവസിച്ചും നാടിൻെറയും ജനങ്ങളുടെയും സൂക്ഷ്മസ്ഥിതിയെ മനസ്സിലാക്കുന്നവർക്ക് മാത്രമേ നാടിനെയും നാട്ടുകാരെയും സമാധാനപൂർവ്വം ഭരിക്കുന്നതിന് സാദിക്കയുള്ളു. ജനക്ഷോഭം എന്നുള്ളത് എന്താണെന്ന് അറിഞ്ഞിട്ടുപോലും ഇല്ലാത്ത തിരുവിതാംകൂറിലെ ജനങ്ങളുടെ - സാധുക്കളായ ജനങ്ങളുടെ - ഇടയിൽ, ഈയിടെയുണ്ടായ - ഇദംപ്രഥമമായി ഉണ്ടായ - ഒരു ക്ഷോഭത്തിന് കാരണം എന്താണെന്ന് വായനക്കാർ ഓർക്കുന്നുണ്ടാകുമല്ലോ. പ്രശാന്തരമണീയമായിരുന്ന തിരുവിതാംകൂറിലെ - സമാധാന സമ്പൂർണ്ണമായിരുന്ന തിരുവിതാംകൂറിലെ - ജനങ്ങളെ - ആബാലവൃദ്ധജനങ്ങളെ - വല്ലാതെ ഒന്ന് പരിഭ്രമിച്ച ആ സംഗതി ആരും വിസ്മരിക്കാൻ കാലമായിട്ടില്ലല്ലോ. ഒരു രാജ്യത്തെ അധിവസിക്കുന്ന ജനങ്ങളുടെ ക്ഷേമാഐശ്വര്യങ്ങൾ മുഖ്യമായി ആ രാജ്യത്തെ ഗവണ്മെന്‍റുദ്യോഗസ്ഥന്മാരിലാണ് സ്ഥിതി ചെയ്യുന്നത്. സർവ്വോപരി ജനങ്ങൾക്ക് ക്ഷേമത്തെയും അവരുടെ ഇടയിൽ ശാശ്വത സമാധാനത്തെയും വർധിപ്പിക്കുന്നതിന് ശ്രമിക്കുന്നതാണ് ഒരു പരിഷ്‌കൃത ഗവണ്മെന്‍റിന്‍റെ മുഖ്യധർമ്മം. ഒരു രാജ്യത്തിൻെറ, അല്ലെങ്കിൽ  ഗവണ്മെന്‍റിന്‍റെ വാസ്തവമായ ബലം, തദ്രാജ്യനിവാസികളായ ജനങ്ങളുടെ സമാധാനസമ്പൂർണ്ണതയിലാണ്  നിക്ഷിപ്തമായിരിക്കുന്നത്. സമാധാന രഹിതവും ക്ഷുഭിതവുമായ ഒരു തനസമുദായത്തെ ഭരിക്കുന്നത് എത്രത്തോളം ദുഷ്കരമായ ഒരു കാര്യമാണെന്ന് റഷ്യാരാജ്യഭരണം നമ്മെ ബോധ്യപ്പെടുത്തുന്നു. റഷ്യ എത്രതന്നെ പ്രാബല്യവും ദ്രവ്യപുഷ്ടിയുമുള്ള ഒരു രാജ്യമായിരുന്നിട്ടും തദ്രാജിയനിവാസികളായ ജനങ്ങളുടെ സമാധാനരഹിതമായ ജീവിതം കൊണ്ട് ആ രാജ്യം ഇപ്പോൾ സദാ ക്ഷുഭിതമായിരിക്കുന്നു! സമാധാനം എന്നുള്ളത് വളരെ നാളായി റഷ്യയിൽ നിന്ന് വളരെ ദൂരം ഓടിപ്പോയിരിക്കുന്നു ! അന്തഃഛിദ്രങ്ങളും കലഹങ്ങളും റഷ്യയെ പ്രീണിച്ചും പീഡിപ്പിച്ചും തുടങ്ങിയിട്ട് മാസങ്ങൾ വളരെയേറെ ആയിരിക്കുന്നു ! ജനങ്ങളുടെ ഹിതാഹിതങ്ങളെ അറിഞ്ഞ് പ്രവർത്തിക്കാത്ത ഒരു ഗവണ്മെന്‍റിന്‍റെ നയം ആപൽക്കരമാണെന്ന് ഒരു പാഠം റഷ്യാ ഗവണ്മെന്‍റ പഠിപ്പിച്ചിരിക്കുന്നു. ജനങ്ങളുടെ ഹിതത്തിനും ആഗ്രഹത്തിനും വിരുദ്ധമായി പ്രവർത്തിക്കുന്ന ഒരു ഗവണ്മെന്‍റ്, ആ രാജ്യത്തെ, ആപൽക്കരമായ ഒരു കുഴിയിലേക്ക് നൈതപ്പിക്കുകയാണ് ചെയ്യുന്നതെന്ന്, റഷ്യാ ഗവണ്മെന്‍റിന്‍റെ പരിതാപകരമായ ആധുനികാവസ്ഥയിൽ നിന്ന് എല്ലാ ഗവണ്മെന്‍റുകളും മനസ്സിലാക്കിക്കഴിഞ്ഞിരിക്കുന്നു. "ജനങ്ങൾക്ക് വേണ്ടിയാണ് ഗവണ്മെന്‍റ്" എന്നുള്ള തത്വത്തെ, "ഗവണ്മെന്‍റിന് വേണ്ടിയാണ് ജനങ്ങൾ " എന്ന് തെറ്റിദ്ധരിച്ച് പ്രവർത്തിക്കുന്നത്കൊണ്ട് ഉണ്ടാകാവുന്ന അനർത്ഥങ്ങൾ അല്പമൊന്നുമല്ല. "ജനങ്ങൾക്ക് വേണ്ടിയാണ് ഗവണ്മെന്‍റ്" എന്നുള്ള സാരമായ തത്വത്തെ വിസ്മരിച്ച് പ്രവർത്തിക്കുന്ന ഒരു ഗവണ്മെന്‍റിന്‍റെ നയം ഒരു വിധത്തിലും പരിതാപകരമാവുകയില്ല  .....  ഭരണീയ ജനങ്ങളെ സഹോദരനിർവിശേഷം സ്നേഹിക്കുന്നില്ലെങ്കിൽ അവരുടെ കൃത്യത്തെ അവർ ശരിയായി നിർവ്വഹിക്കുന്നില്ലെന്ന് അനുമാനിക്കാവുന്നതാണല്ലോ. ഭരണീയജനങ്ങളുടെ സ്ഥിതി, സ്വഭാവം മുതലായത്തുകളെപ്പറ്റി ശരിയായി ഗ്രഹിക്കാത്ത ഉദ്യോഗസ്ഥന്മാർ അവരെ - ഭരണീയ ജനങ്ങളെ സഹോദരനിർവ്വിശേഷം സ്നേഹിക്കുന്നതും അവരുടെ കൃത്യത്തെ സമ്യയ്ക്കായി നിർവഹിക്കുന്നതും എങ്ങനെയെന്ന് ഞങ്ങൾക്ക് മനസ്സിലാകുന്നില്ല. തിരുവിതാംകൂറിലെ ഉയർന്ന ഉദ്യോഗസ്ഥന്മാരുടെ ലിസ്റ്റ് പരിശോധിക്കുമ്പോൾ സ്വദേശസ്നേഹിയായ യാതൊരുവന്‍റെയും ഹൃദയത്തിന് വല്ലാത്ത ഒരു ക്ഷോഭം ഉണ്ടാകാതിരിക്കയില്ല. കഴിഞ്ഞ കൊല്ലത്തെ ഗവണ്മെന്‍റ് വക ഇംഗ്ലീഷ്  പഞ്ചാംഗ നോക്കുന്നവർക്ക് ഞങ്ങൾ ഇപ്പറഞ്ഞത് വാസ്തവമാണെന്ന് ബോധപ്പെടാൻ മാർഗ്ഗമുണ്ട്. വസ്ത്രങ്ങൾക്കായിട്ടും ആയുധങ്ങൾക്കായിട്ടും ഗൃഹോപകരണങ്ങൾക്കായിട്ടും മറ്റു പലവിധത്തിലും നാട്ടുകാരുടെ പണമെല്ലാം പ്രതിനിമിഷമെന്നപോലെ, അന്യ നാടുകളിലേക്ക് കടത്തിവിട്ടുകൊണ്ടിരിക്കുമ്പോൾ ഉയർന്ന ഉദ്യോഗങ്ങൾകൂടി പരദേശികൾക്ക് കൊടുത്ത് രാജ്യത്തിൻെറ ധനപുഷ്ടിയെ ക്ഷയിപ്പിക്കുന്നത് മഹാസങ്കടം തന്നെ. ഉയർന്ന ഉദ്യോഗങ്ങൾക്ക് യോഗ്യതയുള്ളവരായി നാട്ടുകാരിൽ ആരും ഇല്ലാഞ്ഞിട്ടാണ് പരദേശികളെ ഇറക്കുമതി ചെയ്യുന്നതെന്ന് സമാധാനം പറയാൻ ഇപ്പോൾ യാതൊരു മാർഗ്ഗവും ഉണ്ടെന്ന് തോന്നുന്നില്ല. തിരുവിതാംകൂറിലെ, ഒന്നോ രണ്ടോ ഒഴിച്ചുള്ള എല്ലാ ഗവണ്മെന്‍റുദ്യോഗങ്ങളും നാട്ടുകാർക്ക് നിർബന്ധമായി വഹിക്കാവുന്നതാണെന്നാണ് ഞങ്ങൾക്ക് തോന്നുന്നത്. ദിവാൻജി ഉദ്യോഗത്തിനും, കൺസർവേറ്റർ ഉദ്യോഗത്തിനും, പോലീസ് സൂപ്രണ്ട് ഉദ്യോഗത്തിനും, എൻജിനീയർ ഉദ്യോഗത്തിനും, ഡോക്ടർ ഉദ്യോഗത്തിനും, സെക്രട്ടറി ഉദ്യോഗത്തിനും, എന്ന് വേണ്ട ഏത് ഉദ്യോഗത്തിനും ശേഷിയും പരിചയവും ഉള്ളവരായി നാട്ടുകാരിൽ വളരെപ്പേർ ഇപ്പോൾ ഉണ്ട്. ഈ വിഷയത്തിൽ കടം വാങ്ങേണ്ട അവസ്ഥ ഇപ്പോൾ തിരുവിതാംകൂറിനില്ല. ഓരോ വിഷയത്തിലും, അന്യരാജ്യത്ത് നിന്ന് ഇറക്കുമതി ചെയ്യുന്നവരേക്കാൾ യോഗ്യതയുള്ളവരായി പലരും ഇവിടെയുണ്ടെന്നാണ് ഞങ്ങളുടെ വിശ്വാസം. അങ്ങനെയിരിക്കെ മറ്റു നാട്ടുകാരെ ഇവിടെ വരുത്തി നാട്ടുകാർക്ക് ഇച്ഛാഭംഗത്തെയും രാജ്യഐശ്വര്യത്തിന് ഹാനിയെയും അങ്കരിപ്പിക്കുന്നത് മഹാകഷ്ടമെന്നല്ലാതെ മറ്റൊന്നും പറയാൻ കാണുന്നില്ല. കൈത്തൊഴിലിൻെറ അഭാവം കൊണ്ടും ശാസ്ത്രീയമായ കൃഷിയുടെ പ്രചാരക്കുറവ് കൊണ്ടും കച്ചവടത്തിൻെറ അനഭിവൃദ്ധികൊണ്ടും ക്ഷീണധനരായിരിക്കുന്ന, തിരുവിതാംകൂറിലെ ജനങ്ങൾക്ക് തങ്ങളുടെ സഹോദരങ്ങളുടെ ഉദ്യോഗൗന്നത്യപ്രാപ്തികൊണ്ടും സമാധാനപ്പെടുന്നതിനെ ഭാഗ്യമില്ലെന്ന് വന്നിരിക്കുന്നത് ഏറ്റവും പരിതാപകരം തന്നെ എന്നല്ലാതെ എന്ത് പറയുന്നു ! ഇപ്പോൾ ചില നൂതന ഉദ്യോഗങ്ങൾക്ക് ചില പരദേശികളെ നിയമിക്കുന്നതിന് ബലമായി ആലോചന നടന്നു വരുന്നതായി അറിയുന്നു. തിരുവിതാംകൂറിലെ പാവപ്പെട്ട ജനങ്ങളുടെ പണത്തെ ഇങ്ങനെ പരദേശികൾക്കായി കാര്യമില്ലാതെ ധാനം ചെയ്യുന്നത് ഒരു തരം പാപമാണെന്നാണ് ഞങ്ങൾക്ക് തോന്നുന്നത്. ഗവണ്മെന്‍റിന്‍റെ ഈ പരദേശിഭ്രമം ഇനിയെങ്കിലും ത്യജിക്കണമെന്ന് ഞങ്ങൾ സ്നേഹപൂർവ്വം ഉപദേശിക്കുന്നു. നിവൃത്തിയുള്ളിടത്തോളം എല്ലാ വലിയ ഉദ്യോഗങ്ങളും നാട്ടുകാർക്കുതന്നെ കൊടുക്കുന്നതിനാണ് ഗവണ്മെന്‍റ് കരുതേണ്ടത് . രാജ്യക്ഷേമത്തിന് അതാണ് ഉപകരിക്കുന്നതെന്നുള്ളത് നിസ്സംശയമാകുന്നു. ഒരു ഗവണ്മെന്‍റിന്‍റെ നേർക്ക് വാസ്തവമായ ബഹുമാനവും വിശ്വാസവും ജനങ്ങൾക്ക് ഉണ്ടാകണമെങ്കിൽ അവരുടെ യാതൊരു അവകാശത്തിനും ഭംഗം വരാതിരിക്കത്തക്കവിധത്തിൽ ആ ഗവണ്മെന്‍റ്  കരുതിപ്രവർത്തിക്കേണ്ടതാകുന്നു. ജനങ്ങളുടെ ഹിതമറിഞ്ഞ് പ്രവർത്തിക്കുന്നത് എല്ലാ ഗവണ്മെന്‍റിനും ഗുണകരമായിരിക്കും. കരുണാനിധിയായ മഹാരാജാവ് തിരുമനസ്സ്‌കൊണ്ട് ഈ വിഷയത്തിൽ സ്വദേശികൾക്ക് ന്യായമുള്ള  അവകാശത്തിന് ഭംഗം വരാതിരിക്കത്തക്കവിധത്തിൽ,ദയാപൂർവ്വം ആലോചിച്ച് പ്രവർത്തിക്കുമെന്ന് വിശ്വസിച്ച് ഇപ്പോൾ വിരമിക്കുന്നു.    

You May Also Like