സ്വകാര്യവും സർക്കാർ കാര്യവും

  • Published on July 25, 1906
  • Svadesabhimani
  • By Staff Reporter
  • 18 Views

We are in a period in which some government officials are accused of corruption. Having officials who can't separate their private and public interests bring a bad name to the Travancore government.

സർക്കാർ ഉദ്യോഗസ്ഥന്മാരിൽ ചിലരുടെ പേരിൽ കൈക്കൂലി മുതലായ അഴിമതികൾ ആരോപിക്കപ്പെടുകയും, ഹൈക്കോടതിയിൽ നിന്ന് ആക്ഷേപം പറയപ്പെടുകയും ചെയ്തു കൊണ്ടിരിക്കുന്ന തിരുവിതാംകൂർ സംസ്ഥാനം, രാജ്യഭരണ ചാപല്യങ്ങളാൽ വിശേഷപ്പെട്ട ഒരു നാടാണെന്ന് വായനക്കാർ ഓർക്കുമല്ലോ.  ഗവൺമെൻ്റ്  കാര്യങ്ങളെയും സ്വകാര്യ കാര്യങ്ങളേയും തമ്മിൽ വേർപിരിച്ച് ഭരണകർമ്മം നടത്തുവാൻ തക്ക ജനശ്രേഷ്ഠത ഇല്ലാത്ത ചില അനീതിക്കാർ നിമിത്തം ഈ സർക്കാരിന് ഉണ്ടാകാറുള്ള കളങ്കവും വായനക്കാർ ഓർക്കാറുണ്ടായിരിക്കുമല്ലോ.  സർക്കാർ കാര്യങ്ങളെ സർക്കാർ ആഫീസുകളിൽ വച്ച് നിർവ്വഹിക്കാതെ വീട്ടുകച്ചേരി ഏർപ്പാട് ചെയ്തു അവയിൽ ഭാര്യക്കും ചാർച്ചക്കാർക്കും സ്നേഹിതന്മാർക്കും ശ്രദ്ധയെ ഉണ്ടാക്കി അവരുടെ അഭിപ്രായങ്ങളെ  പ്രതീക്ഷിക്കാൻ തയ്യാറായുള്ള ജീവനക്കാർ തിരുവിതാംകൂറിൽ ചുരുക്കമല്ല.  മേല്പറഞ്ഞ ബന്ധുക്കൾ മുഖേന കൈക്കൂലി, ശുപാർശ തുടങ്ങിയ മര്യാദകേടുകളെ  ശീലിച്ച് സർക്കാർ കാര്യങ്ങൾക്ക് ന്യൂനതയും മലിനതയും ഉണ്ടാക്കുന്ന ജീവനക്കാരെ സ്വന്തധർമ്മത്തെ അറിയിക്കുവാൻ തക്കതായ പ്രഭാവം ഉള്ള ഭരണാദ്ധ്യക്ഷന്മാർ ഈ നാട്ടിൽ വാഴാത്തതും ഒരു ശോചനീയമാ വിശേഷം ആകുന്നു.  അഴിമതിയെ കുലവൃത്തിയായി സ്വീകരിച്ചിരിക്കുന്ന ചില ഉദ്യോഗസ്ഥന്മാർ അവരുടെ നിന്ദ്യമായ പ്രവൃത്തികൾ കൊണ്ട് ധനികന്മാരായി വളരെ ആജ്ഞാ ശക്തിയുള്ളവരെന്ന് മറ്റുള്ളവരെ ധരിപ്പിച്ച് ലോകത്തെ  മോഹിപ്പിക്കുന്ന ഈ കാലത്തും, അഴിമതിയെ സ്വീകരിക്കാൻ മടിക്കുന്നവർക്ക് അവരിൽ  നിന്ന് പല ഉപദ്രവങ്ങളും കിട്ടുമാറുമെന്നുള്ളതിന് ഉദാഹരണങ്ങൾ എത്രയോ നാം കാണുന്നുണ്ട്.  സ്വകാര്യങ്ങളെ സർക്കാർ കാര്യങ്ങളോട് ചേർക്കുകയും, സർക്കാർ കാര്യങ്ങളെ സ്വകാര്യങ്ങളിൽ നിന്ന് മാറ്റി നിർത്താതിരിക്കുകയും ചെയ്യുന്ന ചില ഉദ്യോഗസ്ഥർ നിമിത്തം, തിരുവിതാംകൂറിലെ ഗവണ്‍മെന്‍റ് സർവീസിന് അനല്പമായ കറ പറ്റിയിട്ടുണ്ട്; പറ്റുന്നുമുണ്ട്.  ഒരുദ്യോഗസ്ഥന്‍റെ സ്ത്രീ സേവയെ ആരെങ്കിലുമൊരുവൻ തടുക്കുന്നതായി കണ്ടാൽ, അയാൾ കീഴ് ജീവനക്കാരനോ, തൻ്റെ ഇഷ്ടനായ മറ്റൊരുദ്യോഗസ്ഥന്‍റെ വകുപ്പിലുള്ളവനോ ആണെന്ന് കണ്ടാൽ, അയാളെ കഴിയുന്നിടത്തോളം ഉപദ്രവിക്കുകയും, ജോലിയിൽ നിന്ന് മാറ്റിക്കുകയും  ചെയ്യുന്നതിന് ആ ഉദ്യോഗസ്ഥൻ  ശ്രദ്ധാലുവായിരിക്കുന്നു.  സേവ  കൊണ്ടോ ആശ്രയം കൊണ്ടോ കൈക്കൂലി കൊണ്ടോ, ഒരുവൻ തൻ്റെ  വല്ലവകയേയും ഗവണ്‍മെന്‍റിനെ കൊണ്ട് സ്വീകരിപ്പിച്ചതായി കണ്ടിട്ട് മറ്റൊരുവൻ ആ അന്യായത്തെ വെളിപ്പെടുത്തിയാൽ ഇവനെയോ ഇവന്‍റെ ബന്ധുക്കളെയോ സർക്കാർ ജോലിയിൽ നിന്ന് നീക്കുവാൻ തുനിയുന്നവരും ഈ നാട്ടിൽ അല്പമല്ലാ.  കൈക്കൂലി വാങ്ങി ജീവനം കൊടുക്കുന്ന ഒരുവന്‍റെ പ്രവൃത്തിയെ നിന്ദിക്കുകയും, അങ്ങനെയൊരു പ്രവൃത്തിയുടെ ഫലത്തെ  ദൂരത: പരിവർജ്ജിക്കുകയും ചെയ്യുന്നതിന് തക്ക മനോധൈര്യവും  നീതിനിഷ്ഠയും ഉള്ള ജീവനക്കാരനെ അയാളുടെ മേലാവിനെ  കൊണ്ട് കഴിയുന്നത്ര ഉപദ്രവിപ്പിക്കയും, അയാളുടെ കയറ്റത്തെ തടയുകയും, അയാളെ വല്ല വനപ്രദേശങ്ങളിലേക്കോ വിജനസ്ഥലങ്ങളിലേക്കോ മാറ്റുകയും, അയാളുടെ, ബന്ധുക്കളെ ദ്രോഹിക്കുകയും ചെയ്യുന്നതിനും ഈ നാട്ടിലെ ചില ****സ്വകാര്യരഹസ്യങ്ങളെ  സർക്കാർ കാര്യങ്ങളിൽ ഉൾപ്പെടുത്തി, ഓരോരുത്തരെ ക്ലേശിപ്പിക്കുന്നതിന് തയ്യാറായുള്ള ഉദ്യോഗസ്ഥന്മാരിൽ ചിലർ പാശ്ഛാത്യ വിദ്യാഭ്യാസത്തിന്‍റെ ഉത്തമ സന്തതികളാണെന്നും അവർ അഭിമാനിക്കുന്നുണ്ട്.  ഇപ്രകാരമുള്ള അഴിമതികൾ കൊണ്ട്, സർക്കാർ സർവീസിൽ പ്രവേശിക്കുന്ന യുവാക്കന്മാർ, കോളേജിലും സജ്ജനസംസർഗ്ഗത്താലും അഭ്യസിച്ചിട്ടുള്ള സന്മാർഗ്ഗനിഷ്ഠയെ വെടിയുവാൻ നിർബന്ധിതന്മാരായി തീർന്നിട്ടുണ്ടെന്നും വ്യസനസമേതം പറഞ്ഞേ   തീരു.  ഈ വക അക്രമങ്ങൾ ഇനി എന്നാണ് തിരുവിതാംകൂറിൽ നിന്ന് നീങ്ങുന്നതെന്ന് ഞങ്ങൾ അറിയുന്നില്ലാ.  ഇവയുടെ അതിയായ ആക്രമണം നിമിത്തം തിരുവിതാംകൂർ നഭോമണ്ഡല ദുർവായുക്കളാലും വിഷമായ വസ്തുക്കളാലും നിറയപ്പെട്ട പൊതുജനങ്ങൾക്ക് ദുസ്സഹമായ പീഡയെ നൽകി വരുന്നു.  

സ്കൂൾ റേഞ്ച് ഇൻസ്‌പെക്ടർ മിസ്റ്റർ രാമസ്വാമി അയ്യരെ കൊല്ലത്തേക്കും, അവിടെ നിന്നും മിസ്റ്റർ രാജരാജവർമ്മാവിനെ കോട്ടയത്തേക്കും, അവിടെ നിന്നും മിസ്റ്റർ സി. കൃഷ്ണപിള്ളയെ തിരുവന്തപുരത്തേക്കും മാറ്റിയിരിക്കുന്നതായി ആദ്യം ഉത്തരവ് പുറപ്പെടുകയും, ഉടൻ ആ ഉത്തരവിനെ റദ്ദ് ചെയ്ത് മറ്റൊരു ഉത്തരവ് പുറപ്പെടുകയും ചെയ്തതായും, ഇങ്ങനെ വന്നത് മിസ്റ്റർ രാമസ്വാമി അയ്യർക്ക് തിരുവനന്തപുരം വിട്ടുപോകാനുള്ള മനസ്സ് കേടുകൊണ്ട് വലിയ കൊട്ടാരത്തിൽ  അറിയിച്ചതിന്‍റെ  ഫലമാറ്റിയിട്ടാണെന്നും ഞങ്ങൾ കഴിഞ്ഞകുറി പറഞ്ഞുവല്ലോ.  ഇപ്പോൾ രണ്ടാമത്തെ ഉത്തരവിനെ ഭേദപ്പെടുത്തി, ആദ്യ ഉത്തരവിനെ സ്ഥിരപ്പെടുത്തിയിക്കുന്നതായി മൂന്നാമതൊരുത്തരവ് പുറപ്പെടുവിച്ചിരുന്നു.  ഈ അസ്ഥിരതയും "അലോക്യവും''  സർക്കാർ കാര്യത്തിൽ സ്വകാര്യത്തെ ഉൾപ്പെടുത്തിയതിനാൽ ഉണ്ടയതാണെന്നല്ലാതെ മറ്റെന്താണ് പറയേണ്ടത്?  ഇൻസ്പെക്ടർമാർക്ക് മുമ്മൂന്നു കൊല്ലം കൂടുമ്പോൾ കൊടുക്കേണ്ട സ്ഥലം മാറ്റം കൊടുക്കുന്ന വിഷയത്തിൽ സ്വകാര്യ താല്പര്യത്തെയോ സ്വകാര്യ വൈരത്തെയോ പരിഗണിക്കേണ്ട ആവശ്യം ഇല്ല.  മിസ്റ്റർ കൃഷ്ണപിള്ളയ്ക്ക് ഈ റേഞ്ചിലേക്ക് മാറ്റം കിട്ടാൻ അവകാശം ഇരിക്കേ അത് നല്കാതിരിക്കുന്നതിന് ചിലർ പ്രയോഗിച്ചിട്ടുള്ള കുൽസിത തന്ത്രങ്ങൾ ഞങ്ങൾ അറിയുന്നുണ്ട്.  അദ്ദേഹം ചില അഴിമതിക്കാരുടെ അടിമയായിരിപ്പാൻ മനസ്സില്ലാതെയും, സ്വന്തമാനത്തെയും സ്ഥാനത്തേയും കളങ്കപ്പെടുത്താതെയും,  ആ വകക്കാരുടെ ഉപദ്രവങ്ങളെ  സഹിച്ചു തുടങ്ങീട്ട് പത്തിരുപത് കൊല്ലം കഴിഞ്ഞിരിക്കുന്നു.  തിരുവനന്തപുരത്തുള്ള ചില കപടതന്ത്ര മന്ത്രണസഭക്കാരുടെ കൂട്ടത്തിൽ ഉൾപ്പെടായ്ക കൊണ്ടാണ്  അദ്ദേഹം ഈ ക്ലേശങ്ങൾ അനുഭവിക്കുന്നത് എന്നും ഞങ്ങൾ അറിഞ്ഞിട്ടുണ്ട്.  സ്വന്ത വേലയെ കാര്യശേഷിയോടും അഴിമതിയൊന്നും കൂടാതെയും  നിർവഹിക്കുന്നതിനാൽ മനസ്സാക്ഷിയെ വഞ്ചിക്കാത്ത ഇങ്ങനെയുള്ള ഉദ്യോഗസ്ഥന്മാർ സേവയ്‌ക്കോ കൈക്കുലിക്കോ മറ്റോ തുനിയായ്‍ക കൊണ്ട് സർക്കാർ കാര്യവും സ്വകാര്യവും തമ്മിൽ കൂട്ടിക്കലർത്തി ചിലർ ചെയ്തു വരുന്ന അക്രമങ്ങൾ ഒരു ധീരനായ ദിവാൻജിയുടെ  ആഗമനത്തിലെങ്കിലും മാറുമെന്ന് നമുക്ക് ആശിച്ചിരിക്കാം.  

You May Also Like