നമ്മുടെ തൊഴിലില്ലാത്തവർ - 1

  • Published on September 29, 1909
  • Svadesabhimani
  • By Staff Reporter
  • 36 Views

The one topic that was carefully discussed at the 12th anniversary of vidyabhivarshini mahasabha was unemployment among the Nair community.  Throughout his paper, Parameswaran Pillai demonstrates that the main reason for unemployment in the nair community is the inheritance of wealth they are receiving as a result of the matriarchal system.

തിരുവിതാംകൂർ  വിദ്യാഭിവർദ്ധിനി  മഹാസഭയുടെ പന്ത്രണ്ടാം  വാർഷിക സമ്മേളനാവസരത്തിൽ പ്രതിപാതിക്കപെട്ട  പ്രസംഗവിഷയങ്ങളിൽ  വളരെ  ആലോചനയോടുകൂടി  ഉപന്യസിച്ചിരുന്ന  ഒരു കാര്യം  നായന്മാരുടെ  ഇടയിൽ  തൊഴിലില്ലാതെ  നടക്കുന്നവരെക്കുറിച്ചുള്ളതായിരുന്നു.   ഈ വിഷയത്തെ പ്രസംഗിച്ച കെ പരമേശ്വരൻ പിള്ള ബി .എ .ബി .എൽ  അവർകളുടെ ഉപന്യാസം കഴിഞ്ഞലക്കം പത്രത്തിൽ പ്രസിദ്ധീകരിച്ചു തുടങ്ങുകയും, ഈ ലക്കത്തിൽ ഉപസംഹരിക്കുകയും ചെയ്‌തിട്ടുണ്ട് .നായന്മാരുടെ  ശ്രേയസ്സിങ്കൽ  ആകാംക്ഷയുള്ളവരാരും ഈ പ്രസംഗത്തെ ഗാഢമായി പാര്യാലോചിക്കുവാൻ  തക്കഗൗരവും യോഗ്യതയും അതിനുണ്ടെന്ന് ഞങ്ങൾ വിചാരിക്കുന്നതിനാൽ , അതിലെ മുഖ്യമായ വാദങ്ങളെപ്പറ്റി ഏതാനും വിമർശം ചെയ്യേണ്ടതു ആവശ്യമായിരിക്കുന്നു.  മിസ്റ്റർ പരമേശ്വരൻ പിള്ളയുടെ പ്രസംഗത്തിനു വിഷയീ ഭവിച്ചിട്ടുള്ളവരായ തൊഴിലില്ലാത്തവർ, യൂറോപ്പ് മുതലായ പാശ്ചാത്യരാജ്യങ്ങളിൽ ഇപ്പോൾ വർദ്ധിച്ചുകാണപ്പെടുന്ന തൊഴിലില്ലാത്തവരുടെ പ്രതിപുരുഷന്മാരല്ല. ആ രാജ്യങ്ങളിലെ തൊഴിലില്ലാത്തവർക്ക്, പ്രവർത്തി ചെയ്യാൻ കായബലവും മനസ്സും ഉണ്ടെങ്കിലും, ചെയ്യുന്നതിനുവേണ്ട വേലകൂടിയായാലാണ്  ............... . യന്ത്രങ്ങളുടെ സഹായത്തെ മുഖ്യമായി അവലംബിച്ച്  ധനാർജ്ജനത്തിൽ  ഉൽസുകന്മാരായിരിക്കുന്ന മൂലധനവാന്മാരുടെ  വ്യവസായ വ്യവസ്ഥകളുടെ  ഫലമായിട്ടാണ് അനേകലക്ഷം ജനങ്ങൾ ആ നാടുകളിൽ ജോലികിട്ടാതെ അലയേണ്ടിവരുന്നത്. ഇങ്ങനെയൊരു ദുരവസ്ഥ നമ്മുടെ നാട്ടിൽ ഉണ്ടായിട്ടില്ലെന്ന് മാത്രമല്ല, ഇവിടെ പ്രകൃതിയെ കഴിവുള്ളടുത്തോളം  കവരുവാൻ, തക്കവണ്ണം തൊഴിലുകൾ വർദ്ധിച്ചിട്ടുമില്ല. ഈ നാട്ടിലെ തൊഴിലില്ലാത്തവർക്കു ചെയ്യാവുന്ന തൊഴിലുകൾ എത്രയോ ഉണ്ട് . അവർക്ക്  ദേഹ ശക്തിയും ഉണ്ട്. അവർ പാശ്ചാത്യരായ തൊഴിലില്ലാത്തവരെപ്പോലെ ആഹാരം ലഭിക്കാതെ കഷ്ടപ്പെടുന്നുമില്ല. എന്നാൽ, ഇവർക്കും പാശ്ചാത്യർക്കും തമ്മിലുള്ള മുഖ്യമായുള്ള ഭേദം, ഇവർ തൊഴിൽ ചെയ്യാൻ  മനസ്സിലാതെയോ തൊഴിൽ ചെയ്യാതെയോ ഇരിക്കുന്നു എന്നുള്ളതാണ്. ഈ ദോഷം,  ഈ നാട്ടിലെ എല്ലാ  സമുദായങ്ങളെയും  ബാധിച്ചിട്ടില്ല എന്നുള്ളതു കൊണ്ട് തന്നെ, തൊഴിലില്ലാതിരിക്കുന്നു  വർഗ്ഗക്കാർക്ക്  ആ  പരിണാമമുണ്ടാവാൻ എന്തോ ചില വിശേഷ കാരണങ്ങളുണ്ടെന്നു  ഊഹിക്കാവുന്നതാണ്. നായന്മാരുടെ എന്നല്ല, മരുമക്കത്തായം അനുസരിക്കുന്ന ഏതു വർഗ്ഗക്കാരുടെയും  സമുദായത്തിൽ, മിസ്റ്റർ പരമേശ്വരൻപിള്ള  അനുശോചിക്കുന്ന വിധത്തിൽ തൊഴിലില്ലാത്തവരായുള്ളവരുടെ എണ്ണം ഇപ്പോൾ  വർദ്ധിച്ചുതന്നെയായിരിക്കുന്നു. ഏകദേശം ഇരുപത്തയ്യായിരത്തിൽ  കുറയാതെ ചെറുപ്പക്കാർ അഥവാ, തറവാട്ടിളമറക്കാർ, ഇപ്പോൾ ഈ നാട്ടിൽ മേല്പറഞ്ഞ ആലസ്യജീവിതം കൊണ്ടു ജന്മത്തെ  പാഴാക്കിക്കളയുന്ന എന്നു മിസ്റ്റർ പരമേശ്വരൻപിള്ള   കണക്കാക്കി പറയുന്നുണ്ട്.  ഇവർക്ക്  പ്രവർത്തി  ചെയ്യാൻ  ശരീരശക്തിയും ബുദ്ധിശക്തിയും സാമാന്യജ്ഞാനവും തൊഴിലും ഉണ്ട് ; എന്നാൽ , ഇവർ പ്രവർത്തിചെയ്യാതെ, തറവാട്ടിൽ നിന്നു ആഹാരാദികളെ മദിച്ച്‌  അനുഭവച്ചുകൊണ്ടു തറവാട്ടിനു യാതൊരുപകാരവുമില്ലാതെ  കഴിയുന്നു.  ഉപകാരം  ചെയ്യുന്നില്ലെന്നു  മാത്രമല്ല , ഉപദ്രവും, ക്രമത്തിലധികം, ഇവരാൽ ഉണ്ടാകുന്നുമുണ്ട് .  തറവാട്ടിൽ അംഗങ്ങൾ തമ്മിലുള്ള വഴക്കുകളും, കാരണവനും ഇളമക്കാരും തമ്മിലുള്ള വ്യവഹാരങ്ങളും, ചില സംഗതികളിൽ ഇപ്പോൾ കുറെയേറെ  സാധാരണമായി നടന്നുവരുന്ന കുത്തും കൊലപാതകവും മറ്റ്  അക്രമങ്ങളുമൊക്കെ, ഈ തൊഴിലില്ലാത്തവരുടെ ഉപദ്രവത്തൊഴിലുകളാണെന്നു   വേണമെങ്കിൽ പറയാം. ഇവരെ  പ്രവൃത്തിയെയെടുപ്പാനും സ്വപ്രയത്നംകൊണ്ട് നിത്യവൃത്തി  കഴിപ്പാനും ഉത്സാഹിപ്പിക്കയോ ഏർപ്പെടുത്തുകയോ ചെയ്തിരുന്നുവെങ്കിൽ, തറവാട്ടിനു ധനസംബന്ധമായി ഉണ്ടാകുമായിരുന്നു  ആദായം എന്തെന്നു ഗണിക്കപ്പെടാറില്ല. മിസ്റ്റർ പരമേശ്വരൻ പിള്ളയുടെ കണക്കിൻ  പ്രകാരം, ചുരുക്കത്തിൽ 25000  പേർ തൊഴിലില്ലാത്തവരായി കഴിയുന്നുണ്ട് : ഇവരിൽ ഓരോരുത്തന്  ശരാശരി മാസത്തിൽ ചുരുങ്ങിയത് അഞ്ചുറുപ്പിക ഭക്ഷണച്ചെലവിനും ഒരുറുപ്പിക മറ്റ്  ചെലവുകൾക്കും അത്യാവശ്യം വേണമെന്ന് സമ്മതിക്കാതെ കഴികയില്ലലോ.  അപ്പോൾ ഒരു കൊല്ലത്തിൽ, 25000 x 6 x 12,  അതാവിത് പതിനെട്ടുലക്ഷം ഉറുപ്പിക ഇവരുടെ തറവാടുകളിൽ  ഇവർക്കായി പ്രതിഫലം കൂടാതെ ചെലവാക്കുന്നു.  കൊല്ലം തോറുമുള്ള ഈ വാർച്ച  ഉള്ളപ്പോൾ, നായർ സമുദായം ധനവിഷയത്തിൽ ക്ഷയിച്ചത്   അദ്ഭുതമല്ലലോ. ഈ ഇരുപത്തയ്യായിരും  പേർക്കും സ്വപ്രയത്നം ചെയ്തു നിത്യവൃത്തി കഴിപ്പാൻ സൗകര്യവും മനസ്സും ഉണ്ടാക്കി കൊടുക്കയും  അത്  നിർബന്ധിതമാക്കുകയും ചെയ്യുന്നതായിരുന്നാൽ, കൊല്ലത്തിൽ 18 ലക്ഷം രൂപ  നായർ  തറവാട്ടുകളിലേക്ക് ലാഭമാകുന്നതു മാത്രമല്ല, ഇവരുടെ നിത്യവൃത്തിക്കു  അത്രയും തുക  ഇവർ വേല ചെയ്തുണ്ടാക്കുന്നതിനും പുറമെ,  കുറെ സ്വകാര്യ  സ്വത്തുണ്ടാക്കുന്നതിനും കഴിയുന്നതാണ്. എന്തെ  ശരാശരി, പത്തുറുപ്പികയെങ്കിലും  മാസന്തോറും പ്രതി ഫലം ലഭിക്കുമെന്നു വിചാരിക്കാം  അവന്‍റെ  നിത്യവൃത്തിക്കുള്ള ആറു രുപ കഴിച്ചാൽ, മാസത്തിൽ നാലു രുപ നേടുവാനു കഴിയുന്നതാണല്ലോ.  ഇരുപത്തയ്യായിരം  പേർക്ക് ഒരു കൊല്ലത്തിൽ  പന്ത്രണ്ടു ലക്ഷം രുപ ഇങ്ങനെ സമ്പാദ്യമുണ്ടാകുവാൻ സംഗതിയുണ്ട്. ഇതു നിമിത്തം, നായർ സമുദായത്തിലൊട്ടുക്ക് ആണ്ടോടാണ്ട് മുപ്പതുലക്ഷം  ഉറുപ്പികയുടെ സ്വത്തു വർദ്ധിക്കുവാൻ മാർഗ്ഗമുണ്ട്, ഇതിലേക്ക് , ഇപ്പോൾ പ്രതിബന്ധമായി നിൽക്കുന്ന സംഗതികൾ എന്താണെന്നും, അതിന്‍റെ പരിഹാരത്തിനു എന്ത് ചെയ്യണമെന്നും ചിന്തിക്കേണ്ടതാകുന്നു .      



 



       


You May Also Like